正所謂「上樑不正下樑歪」，偏偏英國就到處可見呢啲又歪又唔正嘅「crooked houses」，尤如哈利波特電影佈景一樣。
事實上，哈利波特電影內嘅建築風格正正就係受到部分位於 Lavenham 村莊嘅歪屋所影響，呢條村更直接成為 Harry Potter and the Deathly Hallows Part 1 入面拍攝 Godric’s Hollow 嘅實景，而 Harry Potter 出世間屋嘅真身 De Vere House 亦係位於 Lavenham。如果在座有哈利波特 fans，可以去到 Suffolk 呢條保留得相當完整嘅中世紀小村朝聖，甚至買返間 crooked house 助長歪風。
儘管呢啲屋東歪西倒，但並非興建時嘅設計原意，而係經年累月造成，原因各有不同。由於大多數 crooked houses 都係以木架結構 timber frame 所建成，而其中一種最為常用嘅木材 green oak 收水後係會出現移動嘅情況。
另一方面，建築物過往嘅改建，以至地基沉降都有機會令到間屋結構變形。不過，絕大多數 crooked houses 都無需要過分擔心，因為好多時建築物嘅移動早已停止並且穩定落嚟，又或者經已進行過修復工程，短期內唔會再有結構危險。
其中有個講法係話，古建築係唔怕沉降嘅，因為佢哋只係不斷在尋找最舒適嘅企位。當然如果情況持續惡化，就要尋求有歷史建築經驗嘅結構工程師去提供專業意見；但若果只係舊屋地板有些微傾斜，咁就唔好意思，係正常不過嘅現象。
附圖係其中幾座較為出眾嘅 crooked house，當中位於 Lavenham 嘅 Box Cottage 現正在市場出售，3房嘅歷史建築開價£495,000，有興趣住入 Harry Potter 村嘅朋友可以自行聯絡地產代理。
至於最尾嗰張 Chesterfield 教堂嘅尖頂，就係因為600年前嘅建築工人用咗未經處理嘅木材作為尖頂結構，導致收水後開始扭曲，造就出馳名嘅本地地標「crooked spire」。
【本文獲 英國建築師 授權轉載】
作者簡介：🇬🇧 Architect | 留英港人註冊建築師，同大家深入淺出認識及交流英國建築、文化、歷史、電影、音樂及生活上有用冇用嘅資訊。
Comments