英國冬天黎緊喇，上年唔少人咳到甩肺。唔想喺你身上發生，記得分好自己體質，再強化身體喇，有備無患呀。
首先，醫咩病都好，只要係食落肚嘅中藥，基本分左寒熱虛實先，如果直接對症狀用藥，通常都冇好結果。
由於英國地大脈搏，好多時都把唔到脈，好主要靠睇脷去診斷，新 • 中醫四診「望聞問猜」，靠睇條脷，可以分以下幾個證型： ❄️虛寒咳：脷色淡、肥、有齒痕
🔥熱咳：脷色鮮紅、甚至有紅點突起
🍂燥咳：通常係熱咳既脷，再加脷苔少或有裂痕
💧痰濕咳：脷苔白厚
千奇唔好信晒症狀，一定睇左條脷先講👅
以我經驗英國睇咳嘅病人，大人十個有九個係寒咳，因為操勞虛弱壞習慣，加上寒涼水土天氣引起，最易出現❄️虛寒咳；而小朋友就脾胃積滯濕重比較多，因為食太多甜嘢，容易出現💧痰濕咳。
如果你係萬中無一，天生異稟嘅單純🔥熱咳或🍂燥咳，同時要脷苔唔厚，咁就恭喜你。有機會真係食多幾隻梨、食杯雪糕、食條雪條、飲杯啤酒，就好似飲涼茶嘅道理，凍一凍佢都可能可以好返。
如果唔係就試下以下既自救方法：
（圖案❄️🔥🍂💧係代表該方法適用既咳嗽證型）
1️⃣ 戒口（生冷嘢 甜嘢 果仁類 錯嘅食物/藥物/湯水）❄️🔥🍂💧
病從口入係冇錯，好多病絕對係食出黎。
食唔啱氣候嘅食物都係錯，如西瓜，未必夏天會發病，可以儲埋等到冬天先發。
甚至一直食緊錯嘅藥，只要係❄️虛寒咳都唔食得，包括念慈菴川貝枇杷膏、羅漢果、竹蔗茅根等等，呢啲「藥」只係針對🔥熱咳🍂燥咳。
唔好煲錯湯水，唔好以為乾咳就煲雪梨、蜜糖、沙參、玉竹、雪耳、無花果等等，呢類清潤嘢，只係針對🔥熱咳🍂燥咳。但氣候主宰一切，英國凍多過熱。夏天好乾燥嘅日子可能啱，不過果段時間亦相對少人咳，所以多數都未必啱。咳可以好纏綿同反覆發作，所以唔戒口或一直食緊錯嘅嘢，通常都救你唔到。
2️⃣ 飲多啲溫性嘅茶類 ❄️💧
薑茶、肉桂茶、紅茶類，如痰多咳嗽又脷苔偏白厚，加埋陳皮焗水都可以。
3️⃣ 健脾湯（啱一家大細）❄️🔥🍂💧
適用大多數體質，就算病緊嘅時候，只要唔係熱象好重，都啱飲。亦可加埋川貝去煲，川貝啱所有嘅咳，係睇你配咩去煲，只要配嘅藥啱證型，都可以加強止咳功效。唯一壞處就係正宗川貝係好很貴。
其實平時只要補住個脾胃，就立於不敗之地。脾胃好，好少會病得嚴重，如果真係病左都好快好得返。
4️⃣ 疏通背部經絡（針對上背部）❄️🔥🍂💧
小朋友可搣脊
大人可刮痧或拔罐
呢類外治手法，不論寒熱，大部份人都啱用。
5️⃣ 按壓以下幾個穴位 ❄️🔥🍂💧
合谷、足三里、肺俞
6️⃣熱敷/艾灸 大椎、肺俞位置 ❄️💧
如咳到有喘，甚至可用熱水浸埋對腳。
7️⃣充足休息 ❄️🔥🍂💧
太多人係以虛為主，休息先可以令身體恢復，休息唔夠，就算食咩藥都好難補起個身體。
8️⃣偏方 ❄️💧
最多人問就係燉橙 、燉洋蔥，我自己就一次都未試過，亦唔會建議病人去試。
以我理解，燉橙就係靠橙皮同啲絡去化痰，但化痰嘅力應該遠不及陳皮。
而燉洋蔥有清風寒感冒作用，咁我都係焗啲薑茶算喇，又快又簡單。
當然有人食左係ok，咁恭喜你，可以繼續食。
講左咁多，其實黎黎去去都係果幾招。同埋預防一定勝於治療，特別有啲病人每年都容易轉季咳或一咳就好難好，日常多做以上嘅方法，都會有幫助。
❗以上咳嗽分證型，只係最基本，仲有好多更複雜，已經唔係單靠文字可表達，要經過好多臨床經驗先可以綜合診斷出黎。
透過睇脷去簡單分辦自己證型，雖然唔一定可以單靠自救方法完全好返晒，但起碼都初步知道自己有咩啱食，有咩需要戒口，肯定可縮短病程，更快康復。
最後，想講多少少關於西藥嘅睇法。
究竟我身體啱唔啱食西藥？
食之前不妨睇下條脷先，如果係屬於❄️虛寒咳，我勸你唔好食，食左通常都幫唔到，而且好大機會咳得更勁更耐，甚至喘。所謂武漢肺炎後遺症，一直咳都唔好，通常就係本身虛弱，再食太多西藥，進一步傷害身體造成。
咁咩人啱食西藥？
身體強壯囉，氣血旺盛囉。
強壯既人就算食左中醫認為比較「涼散」嘅西藥都對身體影響唔大，就算唔食藥，休息下其實都好快好返，所以喺我眼中，只要你捱過左起病最辛苦果吓就得。都見唔少病人忍住唔食藥，只係多休息，開頭係感覺上辛苦啲，但捱過左可以突然好返一半以上。
中醫通常都叫人唔好食西藥❌
西醫通常都叫人唔好食中藥❌
通常都係咁，最後都係睇你信邊套，邊套啱自己。
【本文獲 Nottingham x 香港中醫師 授權轉載】
作者簡介：移英香港註冊中醫，提供網上睇症寄藥、面診、手法治療
Comments